Timar Hatyja

Gözi gara, gaşy gara,
Zülpleri timar, Hatyja!
Ýüregime saldyň ýara,
Eýlediň bimar, Hatyja!

Gözüňe sürme ýaraşar,
Biliňe tirme ýaraşar,
Saçyňa örme ýaraşar,
Saçlary şamar Hatyja.

Bagyňda toty-gumrular,
Yzyňda jahyl-jümrüler,
Göwsüňde goşa ýumrular
Almamydyr nar, Hatyja?

Seýdi diýer, bu şertlere,
Başladyň köne ýurtlara,
Meni tükenmez dertlere
Eýlediň duçar, Hatyja!